İran Avropa İttifaqının ittihamlarına cavab verib

13-12-2019, 06:00
203

İran Avropa İttifaqının (Aİ) ölkədə insan hüquqlarının pozulması ilə əlaqədar irəli sürdüyü ittihamlara cavab verib.
AZƏRTAC xəbər verir ki, İran Xarici İşlər Nazirliyinin mətbuat katibi Abbas Müsəvi Avropa İttifaqının nümayəndəsi Hosepa Borrellanın əsassız informasiyalara malik olduğunu bildirib.
Onun sözlərinə görə, Aİ əvvəlcə üzv dövlətlərdə baş verən hadisələrə nəzər salmalıdır. Fransada polisin etirazçılara qarşı göstərdiyi amansızlıq bütün dünyaya məlumdur. Aİ insan hüquqları məsələsindən siyasi alət, müstəqil ölkələrin daxili işlərinə qarışmaq üçün bəhanə kimi istifadə edir. Əgər Aİ insanların hüquqlarının qayğısına qalırsa, onda nə üçün qanunsuz iqtisadi sanksiyaya məruz qalan 80 milyon insanı müdafiə etmir və ABŞ-a etirazını bildirmir?
Müsəvi bildirib ki, noyabrın 15-də İrandakı hadisələr insanlara verilən etiraz hüququnun aşkar nümayişi idi. Lakin dövlət binalarını və ictimai binaları yandırıb dağıtmaq kobud qanun pozuntusudur ki, bu da cinayətdir. Fransada “sarı jiletlilər”in aksiyasında da oxşar hadisə baş vermişdi. Fransa polisi bunun qarşısını qəti şəkildə aldı.
Qeyd edək ki, Aİ-nin beynəlxalq məsələlər və təhlükəsizlik üzrə ali nümayəndəsi Hosepa Borrella İranın Tehran və digər şəhərlərində baş verən aksiyalarda polisin insanlara qarşı qəddarlıq göstərməsinin yolverilməz olduğunu bəyan edib.

Rabil Kətanov
AZƏRTAC-ın xüsusi müxbiri
Tehran


Mənbə: https://azertag.az

BİZİ SOSİAL ŞƏBƏKƏLƏRDƏN İZLƏYİN: